ஹரியானாவின் நூஹ் மாவட்ட துணை கண்காணிப்பாளர் உயிரிழந்த விவகாரம் தொடர்பாக ஹரியானா அரசு விசாரணைக்கு உத்தரவிட்டுள்ளதாக தெரிவித்துள்ளார்.
ஹரியானா மாநிலத்தின் நூஹ் மாவட்ட துணை கண்காணிப்பாளர் சுரேந்திர சிங் பிஷ்னோய் மீது கடந்த 19-ம் தேதி கனரக வாகனம் ஏறியதில் அவர் சம்பவ இடத்திலேயே உயிரிழந்தார்.
ஹரியானா மாநிலத்தில், நூஹ் மாவட்ட துணை கண்காணிப்பாளராக பணியாற்றி வருபவர், சுரேந்திர சிங் பிஷ்னோய். இவருக்கு ஆரவல்லி மலைத்தொடருக்கு அருகில் உள்ள பச்கான் என்ற இடத்தில் சட்டவிரோதமாக பாறைகள் வெட்டி எடுப்பதாக கடந்த 19-ம் தேதி தகவல் வந்துள்ளது. இதைதொடர்ந்து, கடந்த 19-ம் தேதி காலை 11.30 மணியளவில் சம்பவ இடத்துக்கு சுரேந்திர சிங் பிஷ்னோய் காவல்துறையினருடன் சென்றார்.
இந்நிலையில், காவல்துறையினரை கண்டதும், பாறைகளை வெட்டி எடுத்துகொண்டிருந்தவர்கள் சம்பவ இடத்தில் இருந்து தப்பியோடினர். அந்நேரத்தில் மாவட்ட துணை கண்காணிப்பாளர் சுரேந்திர சிங் பிஷ்னோய் நின்று பாறைகளை ஏற்றிச்சென்ற வாகனங்களை நிறுத்துமாறு சைகை காட்டியுள்ளார்.
ஆனால், அவரை எதிர்நோக்கி வந்த கனரக வாகனம் அவர் மீது ஏறியது. இதில் மாவட்ட துணை கண்காணிப்பாளர் சுரேந்திர சிங் பிஷ்னோய் சம்பவ இடத்திலேயே உயிரிழந்தார். இதையடுத்து, சம்பவ இடத்திலிருந்து தப்பியோடிய நபர்களை கைது செய்ய காவல்துறையினர் தேடிவருகின்றனர்.
இந்நிலையில், இச்சம்பவம் குறித்து ஹரியானா முதல்வர் மனோகர் லால் கட்டார் தனது ட்விட்டர் பக்கத்தில் தெரிவித்துள்ளதாவது :
மாவட்ட துணை கண்காணிப்பாளர் சுரேந்திர சிங் கொலை வழக்கில் குற்றத்தை புரிந்தவர்களின் மீது கடுமையான நடவடிக்கை எடுக்க உத்தரவிடப்பட்டுள்ளது. மேலும், இக்குற்றத்தை புரிந்தவர்கள் ஒருவரையும் விடாமல் அனைவரும் தண்டிக்கப்படுவர்.
மாவட்ட துணை கண்காணிப்பாளர் சுரேந்திர சிங் பிஷ்னோய் குடும்பத்துக்கு ஆழ்ந்த இரங்கல்கள்.
இவ்வாறு ஹரியானா முதல்வர் மனோகர் லால் கட்டார் தெரிவித்தார்.
சுரேந்திர சிங் பிஷ்னோய் சரங்கபூர் என்ற கிராமத்தில் பிறந்தார். அதே கிராமத்தில் 1994-ம் ஆண்டு துணை காவல் ஆய்வாளராக அவர் பணியில் சேர்ந்தார். இன்னும் நான்கு மாத காலத்தில் பணி ஓய்வுபெற இருக்கும் நிலையில், சுரேந்திர சிங் பிஷ்னோய் கொலை செய்யப்பட்டுள்ளார்.
இந்நிலையில், கடந்த 19-ம் தேதி அன்று ஹரியானா காவல் கண்காணிப்பாளரை கனரக வாகனம் ஏற்றிக்கொன்ற வழக்கில் ஒருவர் கைது செய்யப்பட்டார்.
இதையடுத்து, முக்கிய குற்றவாளியாக கருதப்படும் சபீர் என்ற கனரக வாகனத்தின் ஓட்டுநர் ராஜஸ்தானின் பரத்பூர் மாவட்டத்தில் கடந்த 20-ம் தேதி கைது செய்யப்பட்டார்.
இச்சம்பவம் குறித்து காவல் கண்காணிப்பாளர் வருண் சிங்ளா கூறுகையில், குற்றம் சுமத்தப்பட்ட நபரை பிடிக்க சுமார் 30 இடங்களில் சோதனை நடத்தினோம். அதன் பிறகே சபீரை கைது செய்தோம் என குறிப்பிட்டுள்ளார்.
முன்னதாக, ஹரியானா மாநில உள்துறை அமைச்சர் அனில் விஜ், நூஹ் மாவட்ட காவல் கண்காணிப்பாளர் உயிரிழந்தது தொடர்பாக நீதி விசாரணைக்கு உத்தரவிடப்படும் என்று ஜூலை 21 அன்று தெரிவித்திருந்தார்.
இது குறித்து அவர் தனது ட்விட்டர் பதிவில் தெரிவித்துள்ளதாவது, “மேவத் பகுதியில் சுரங்க மாஃபியாவால் காவல் கண்காணிப்பாளர் இறந்தது மற்றும் அந்த பகுதியில் சட்டவிரோதமாக சுரங்கம் தோண்டப்பட்ட அனைத்து சூழ்நிலைகள் குறித்தும் நீதி விசாரணை நடத்த ஹரியானா அரசு முடிவு செய்துள்ளது.” என்று குறிப்பிட்டுள்ளார்.
ஹரியானா: கடமையில் இருந்த காவல் கண்காணிப்பாளர் கொலை
