நடிகர் தனுஷ் மீண்டும் இயக்குநராக களமிறங்கவுள்ள திரைப்படத்தின் பெயர் குறித்த தகவல்கள் வெளிவந்துள்ளது.
நடிகர் தனுஷ் இந்திய திரையுலகின் முக்கியமான நடிகராக பார்க்கப்படுபவர்களில் ஒருவர். தமிழில் மட்டும் அல்லாது இந்தியிலும், ஆங்கிலத்திலும் தனுஷ் நடித்த திரைப்படங்கள் நல்ல வரவேற்பை பெற்றன. இதனால் தனுஷ் பரவலாக அறியப்பட்டார்.
தற்போது தனுஷ் நடிப்பில் ரெடியாகியுள்ள ‘வாத்தி’ திரைப்படம் பிப்ரவரி மாதம் வெளியாகவுள்ளது. இத்திரைப்படம் அல்லாமல், சாணிக்காயிதம் மற்றும் ராக்கி போன்ற திரைப்படங்களை இயக்கிய அருண் மாதேஸ்வரன் இயக்கத்தில் கேப்டன் மில்லர் என்ற திரைப்படத்தில் நடித்து வருகிறார்.
இப்படம் ஒரு பான்- இந்தியா திரைப்படமாக உருவாகி வருவதாக தகவல்கள் வெளிவந்துள்ளது. இந்நிலையில், நடிகர் தனுஷ் மீண்டும் இயக்குநர் அவதாரம் எடுக்க உள்ளதாக தகவல்கள் வெளிவந்த வண்ணம் உள்ளன.
இதைத்தொடர்ந்து, நடிகர் தனுஷ் இயக்கவுள்ள திரைப்படத்தில் எஸ்.ஜே.சூர்யா, விஷ்ணு விஷால் நடிக்க உள்ளதாகவும், இத்திரைப்படத்தை சன் பிக்சர்ஸ் தயாரிக்க உள்ளதாகவும் கூறப்பட்டு வந்தது. ஆனால், இது குறித்த அதிகாரப்பூர்வ தகவல்கள் இதுவரை வெளியாகவில்லை.
இந்நிலையில், தனுஷ் இயக்கவுள்ள திரைப்படத்தில் காளிதாஸ் மற்றும் துஷரா விஜயன் நடிக்க உள்ளதாகவும், இப்படத்திற்கு ‘ராயன்’ என்று பெயர் வைத்துள்ளதாகவும், வட சென்னையை மையமாகக் கொண்டு இப்படம் உருவாகும் என்றும் தகவல்கள் வெளிவந்துள்ளது.
முன்னதாக, தனுஷ் இயக்கிய பா. பாண்டி திரைப்படம் மக்களிடையே பெரிய அளவில் வரவேற்பை பெற்றது குறிப்பிடத்தக்கது.
சொத்து இழந்ததில் கின்னஸ் சாதனை படைத்த எலான் மஸ்க்கின் அடுத்த திட்டம்?