தமிழகம் முழுவதும் குரூப் 1 தேர்வு விரிவான பாதுகாப்புடன் தொடங்கியுள்ளது.
தமிழகம் முழுவதும் மூன்று படிநிலைகளைக் கொண்ட குரூப் 1 தேர்வு தற்போது நடைபெற்று வருகிறது. தற்சமயம், இந்த தேர்வானது 38 மாவட்ட மையங்களில் நடைபெற்று வருகின்றன. காலை 9.30 மணிக்கு தொடங்கிய இந்த தேர்வானது இன்று நண்பகல் 12.30 மணி வரை நடைபெறவுள்ளது.
மேலும், இத்தேர்வை எழுத 3 லட்சத்து 22 ஆயிரத்து 414 பேர் அனுமதிக்கப்பட்டுள்ளனர். விரிவான பாதுகாப்பு ஏற்பாடுகளுடனே இந்த வேலை நடைபெற்று வருவதாக தேர்வாணைய அதிகாரிகள் தெரிவித்துள்ளனர்.
முன்னதாக, காலியிடங்களை நிரப்புவதற்கான தேர்வு அறிவிக்கை கடந்த ஜூலை 21-ஆம் தேதி வெளியிடப்பட்டது. தேர்வுக்கு விண்ணப்பிக்க கடந்த ஆகஸ்ட் 22-ஆம் தேதி கடைசி நாள் என அறிவிக்கப்பட்டது. இதைத்தொடர்ந்து, இந்தத் தேர்வை எழுத 3 லட்சத்து 22 ஆயிரத்து 416 பேர் விண்ணப்பித்திருந்தனர்.
இந்த குரூப் 1 பிரிவில், துணை ஆட்சியர், துணைக் காவல் கண்காணிப்பாளர், வணிகவரி உதவி ஆணையர், கூட்டுறவு சங்கங்களின் துணைப் பதிவாளர், ஊரக வளர்ச்சி உதவி இயக்குநர், மாவட்ட வேலைவாய்ப்பு அலுவலர் என மொத்தம் 92 காலிப் பணியிடங்கள் அறிவிக்கப்பட்டுள்ளது குறிப்பிடத்தக்கது.
