நடிகர் சிவகார்த்திகேயன் நடித்து வரும் மாவீரன் படத்தின் முதல் சிங்கிள் சிவகார்த்திகேயனின் பிறந்தநாளை முன்னிட்டு இன்று வெளியாகியுள்ளது.
டாக்டர், டான் என வரிசையாக வெற்றித்திரைப்படங்களை கொடுத்த சிவகார்த்திகேயன் சமீபத்தில் வெளிவந்த பிரின்ஸ் திரைப்படத்தின் மூலம் சற்றே சறுக்கலை சந்தித்தார். இந்நிலையில், இந்த சறுக்கலுக்கு நேரெதிராக வெற்றி பெற வேண்டுமென்ற நோக்கத்தில் தற்போது சிவகார்த்திகேயன் இயங்கி வருகிறார்.
சிவகார்த்திகேயன் தற்போது, தேசிய விருது பெற்ற இயக்குநர் மடோனா அஸ்வின் இயக்கத்தில் ‘மாவீரன்’ என்ற திரைப்படத்தில் நடித்து வருகிறார். மடோனா அஸ்வின் முன்னதாக யோகிபாபு நடிப்பில் வெளிவந்து நல்ல வரவேற்பை பெற்ற ‘மண்டேலா’ என்ற திரைப்படத்தை இயக்கியிருந்தார்.
வித்தியாசமான கூட்டணியாக சிவகார்த்திகேயன்-மடோனா அஸ்வின் கூட்டணி இருக்குமென்று எதிர்பார்க்கப்படுகிறது. இதனால் திரைப்படத்தின் மீது எதிர்பார்ப்பு எழுந்துள்ளது. மேலும், மாவீரன் திரைப்படத்தில் பிரபல இயக்குநர் மிஷ்கின், சரிதா, யோகிபாபு போன்றோர் நடிக்கிறார்கள். இதில் ஷங்கரின் மகள் அதிதி ஷங்கர் நாயகியாக நடித்துள்ளார்.
தெலுங்கு மற்றும் தமிழில் பைலிங்குவல் முறையில் உருவாகி வரும் இப்படம், தெலுங்கில் ‘மாவீருடு’ என தலைப்பிடப்பட்டுள்ளது. இப்படத்திற்கு ‘ஆடை’, ‘மண்டேலா’ ஆகிய படங்களுக்கு இசையமைத்த பரத் ஷங்கர் இசையமைக்கிறார்.
இந்நிலையில் இப்படத்தின் முதல் சிங்கிள் பாடல் ‘சீனா சீனா’ இன்று வெளியாகியுள்ளது. சிவகார்த்திகேயனின் பிறந்தநாள் ரசிகர்களால் கொண்டாடப்பட்டு வரும் நிலையில், அவர்களுக்கு இப்பாடல் பர்த்டே ட்ரீட் ஆக உள்ளதாக சமூகவலைதளங்களில் தெரிவித்து வருகின்றனர்.
