வாரிசு மற்றும் துணிவு திரைப்படங்களின் முதல் நாள் வசூல் குறித்த தகவல்கள் வெளிவந்துள்ளது.
விஜய் – அஜித்குமார் இருவரும் தமிழ்த் திரையுலகின் மிக முக்கியமான முன்னணி நட்சத்திரங்கள் என்பது மறுக்க முடியாத ஒன்றாகும். இருவரின் திரைப்படங்களும் திரையரங்குகளில் வெளியாகும் நாள் திருவிழாவாக மாறிவிடுகிறது. அப்படியான திருவிழாவை விஜய்யின் வாரிசு திரைப்படம் மூலமும், அஜித்குமாரின் துணிவு திரைப்படமும் நேற்று முதல் பல திரையரங்குகள் கண்டு வருகிறது. நேற்று துணிவு திரைப்படம் அதிகாலை 1 மணிக்கும், வாரிசு அதிகாலை 4 மணிக்கும் வெளியானது.
வம்சி இயக்கி, தமன் இசையமைத்திருக்கும் வாரிசு திரைப்படமும், எச்.வினோத் இயக்கி, ஜிப்ரான் இசையமைத்திருக்கும் துணிவு திரைப்படமும் ரசிகர்களிடம் கலவையான விமர்சனங்களை பெற்று வருகிறது.
இந்நிலையில், இரு திரைப்படங்களின் முதல்நாள் வசூல் குறித்த தகவல்கள் தற்போது வெளிவந்துள்ளது. அதன்படி, துணிவு திரைப்படம் தமிழகத்தில் ரூ.17.5 கோடியையும் வாரிசு திரைப்படம் ரூ.17 கோடியையும் வசூல் செய்துள்ளதாக தகவல்கள் வெளிவந்துள்ளது.
அதேநேரம், இந்திய அளவில் துணிவு திரைப்படம் ரூ.24 கோடியையும், வாரிசு ரூ.26.5 கோடியையும் வசூலித்துள்ளதாக தகவல் வெளியாகியுள்ளது. மேலும், உலகளவில் துணிவு ரூ.30 கோடியையும், வாரிசு ரூ.35 கோடியையும் வசூலித்துள்ளதாக தகவல்கள் தெரிவிக்கின்றன.
ஆந்திரா மற்றும் தெலங்கனாவில் வாரிசு திரைப்படம் வருகிற 14-ஆம் தேதி வெளியாகவுள்ளது குறிப்பிடத்தக்கது.
வாரிசு, துணிவு படக்குழுவுக்கு வந்த நல்ல செய்தி.. குஷியில் விநியோகஸ்தர்கள்