ஒரு தனிப்பட்ட நபரின் வளர்ச்சி, பல தமிழக மக்களுக்கு நம்மில் ஒருவன் வளர்கிறான், நம்மில் ஒருவன் அங்கே ஜெயிக்கிறான் என்ற உணர்வை தருவது என்பது அவ்வளவு எளிதில் நிகழ்வதில்லை. ஆனால், அப்படியான ஒரு வளர்ச்சியை தற்போது நிகழ்த்தியுள்ளவர்தான் சிவகார்த்திகேயன். தற்போதைய தமிழ் திரையுலகில் தவிர்க்க முடியாத நாயகன் சிவகார்த்திகேயன்!
திரைக்கு பின்னால் உழைத்து, அது இது எது, கலக்க போவது யாரு, ஜோடி நம்பர் ஒன் என சின்னத்திரையில் உழைத்து, பலரை மகிழச்செய்து, மிளிர்ந்து வெள்ளித்திரையில் நுழைந்த சிவகார்த்திகேயன் அங்கும் தனது உழைப்பை முதலீடாக மாற்றி தற்போது வெற்றியை அறுவடை செய்து வருகிறார்.
எண்ணிக்கையின் அடிப்படையில் பார்ப்போமேயானால் இதுவரை 20 திரைப்படங்கள் மட்டுமே சிவகார்த்திகேயன் நடிப்பில் வெளிவந்திருக்கிறது ஆனால் இந்த இருபது திரைப்படத்திற்கே சிவகார்த்திகேயன் எட்டி இருக்கும் உயரம் என்பது அசாத்தியமானது. முயற்சிதன் மெய்வருத்தக் கூலி தரும் என்று திருக்குறளின் வரிக்கு இருக்கும் எடுத்துக்காட்டுகளில் சிவகார்திகேயனும் ஒன்றென்பதை பலரும் ஒப்புக்கொண்டுள்ளனர்.
தற்போதைய காலக்கட்டத்தில் குடும்பங்களை குடும்பமாகவே திரையரங்கிற்கு ஈர்த்துக் கொள்வதென்பது இலேசானது அல்ல. ஆனால் சிவகார்த்திகேயன் திரைப்படத்திற்கு வரும் குடும்பங்களின் எண்ணிக்கை நாளுக்கு நாள் அதிகரித்துக்கொண்டே செல்கிறது. கடந்த ஆண்டுகளில் சிவகார்த்திகேயன் நடிப்பில் வெளியான டாக்டர், டான் போன்ற திரைப்படங்கள் மேல் சொன்னவைக்கு சான்று!
சிவகார்த்திகேயனின் காமெடி கலாட்டாக்கள் மட்டுமே ஆரம்பத்தில் அவருக்கு துணை இருக்க, தற்போது துளியும் காமெடி கலாட்டாக்கள் செய்யாமலும் தன்னால் திரைப்படம் நடிக்க முடியும் என்ற அளவிற்கு தன்னை மெருகேற்றி இருக்கிறார். நடனம், எமோஷன், ஆக்ஷன் என தற்போது அனைத்திலும் தன்னை முன்னிலை படுத்தி வருகிறார். வெறுமனே நடிகராக இல்லாமல் பாடகராகவும், தயாரிப்பாளராகவும் வெற்றி வலம் வருகிறார், சிவகார்த்திகேயன்!
தமிழக திரையுலகில் தனக்கென்று தனி அடையாளத்தை உருவாகியுள்ள சிவகார்த்திகேயன் அடுத்தாக தென்னிந்திய திரையுலகத்தில் அடையாளத்தை உருவாக்க காலடி எடுத்து வைத்துள்ளார். அதற்கு சிவகார்த்திகேயனின் நடிப்பில் தற்போது உருவாகி வரும் மாவீரன் திரைப்படம் உதவும் என்று ரசிகர்களால் எதிர்பார்க்கப்படுகிறது.
எப்படி தமிழக மக்களை கவர்ந்தாரோ அதேப்போல் திறம்பட தென் இந்திய அளவிலும் மக்களை கவரவும், மென்மேலும் வெற்றிகளை பெறவும் இந்த பிறந்தநாளில், சிவகார்த்திகேயனுக்கு வாழ்த்துகள் தெரிவிக்கிறது, தினவாசல்!
