பிரபல வேகப்பந்து வீச்சாளர் பும்ரா மும்பை இந்தியன்ஸ் அணியில் இடம்பெறுவாரா? இல்லையா? என்ற கேள்வி ரசிகர்களிடையே எழுந்து வருகிறது.
இந்திய கிரிக்கெட் அணியின் நட்சத்திர பந்துவீச்சாளர், பும்ரா. 29 வயதாகும் இவர் இதுவரையில் இந்தியாவுக்காக 30 டெஸ்டுகள், 72 ஒருநாள், 60 இருபது ஓவர் ஆட்டங்களில் விளையாடியுள்ளார்.
முதுகில் ஏற்பட்ட காயம் காரணமாக இந்திய அணியில் கடந்த ஆண்டு செப்டம்பர் முதல் பும்ரா இடம்பெறவில்லை. இதன்பிறகு, பெங்களூரில் உள்ள நேஷனல் கிரிக்கெட் அகாடமியில் சிகிச்சையும் பயிற்சியும் பெற்று வந்த பும்ரா, முழு உடற்தகுதியை அடைந்துள்ளதாக கூறப்பட்டது.
இதனால், இலங்கைக்கு எதிரான ஒருநாள் தொடரில் விளையாடும் இந்திய அணியில் பும்ரா சேர்க்கப்பட்டார். பின்னர் உடல்நிலை முழுத் தகுதியை அடையவில்லை எனக்கூறி இலங்கை மற்றும் ஆஸ்திரேலிய தொடர்களில் பும்ரா சேர்க்கப்படவில்லை.
இதைத்தொடர்ந்து, ஐபிஎல் தொடரிலும் பும்ரா பங்கேற்க மாட்டார் என்று கூறப்படுகிறது. அவருக்கு பதிலாக வேகப்பந்து வீச்சாளர் சந்தீப் வாரியர் சேர்க்கப்பட்டுள்ளதாக தகவல்கள் தெரிவிக்கின்றன. இந்நிலையில், மும்பை அணி வீரர்களின் பயிற்சியின் போது பும்ரா பந்துவீசி பயிற்சி எடுத்து வருவதாக தகவல்கள் தெரிவிக்கின்றன. இதனால், பும்ரா அணியில் இடம்பெறுவாரா? இல்லையா? என்ற கேள்வி ரசிகர்களிடையே எழுந்து வருகிறது.
மும்பை அணி வருகிற ஏப்ரல் 2-ஆம் தேதி பெங்களூர் அணியை எதிர்கொள்ளவுள்ளது என்பது குறிப்பிடத்தக்கது.