புவி வெப்பமடையும் நிகழ்வின் வீரியம் கடந்த சில வருடங்களாகவே அதிகரித்து காணப்படுகிறது. இப்புவி வெப்பமயமாதல் ஆனது புவியில், பெரிய மாற்றங்களை சிறிய சிறிய அளவில் நிகழ்த்தி வருகிறது. சிறு அளவில் மாற்றங்கள் நிகழ்வதால் நாமும் அவற்றைக் கண்டுக்கொள்ளாமல் விட்டுவிடுகிறோம்.
சிறுதுளி பெரு வெள்ளம் என்பது நன்னிகழ்வுகளுக்கு மட்டுமல்ல தீய நிகழ்வுகளுக்கும் பொருந்தும். ஆம்! துளியளவு கவனச்சிதறல் பெரிய இன்னல்களில் கொண்டுச்சென்று நிறுத்தும். தற்சமயத்தில் நாம் அனைவரும் அப்படியான கவனச்சிதறலில்தான் உள்ளோம்.
புவி வெப்பமயமாதல் பல நிகழ்வுகளுக்கு காரணமாய்க் கொண்டிருக்கும் சமயத்தில் பறவையியல் ஆராய்ச்சியாளர்கள் ஒரு நிகழ்தலைக் கண்டுப்பிடித்துள்ளனர். அதன்படி, பறவை இனங்களில் சிலவை இயல்பாக முட்டையிடும் காலத்தில் இருந்து மாற்றமடைந்து முன்கூட்டியே முட்டையிடுகின்றன.
காலநிலை மாற்றம் வட அமெரிக்காவின் பெரும்பகுதியில் வசந்த காலத்தை தூண்டுவதால், பல பறவைகள் ஆண்டின் தொடக்கத்தில் முட்டையிடுகின்றன.
சிகாகோவைச் சுற்றி ஆய்வு செய்யப்பட்ட 72 பறவை இனங்களில், மூன்றில் ஒரு பங்கு ஒரு நூற்றாண்டுக்கு முன்பு செய்ததை விட சுமார் 25 நாட்களுக்கு முன்னதாகவே முட்டையிடும் வழக்கத்தைத் தற்போது கொண்டிருப்பதாய் தெரிவித்துள்ளனர்.
பாதிக்கப்பட்ட பறவை இனங்களில் அமெரிக்க கெஸ்ட்ரல் மற்றும் கூப்பர்ஸ் ஹாக் ஆகியவைகளும் அடங்கும் என்று தெரிவிக்கப்பட்டுள்ளது. ஆராய்ச்சியாளர்கள், இப்பறவை இனங்கள் ஏன் தங்கள் முட்டையிடும் அட்டவணையை மாற்றுகின்றன என்ற வினாவுக்கு சரியான பதில் கிடைக்கவில்லை என்றனர்.
அதேசமயம், இதுவரை இந்த இனங்கள் பகிர்ந்து கொள்ளும் எந்த தெளிவான பண்புகளையும் கண்டுபிடிக்கவில்லை, அதாவது அளவு அல்லது இடம்பெயர்வு நிலை போன்றவை, அவை ஏன் தங்கள் அட்டவணையை மாற்றுகின்றன என்பதை விளக்கக்கூடும்.
ஆனால் “நாம் பார்த்த பெரும்பாலான பறவைகள் பூச்சிகளை உண்கின்றன, மேலும் பூச்சிகளின் பருவகால நடத்தையும் காலநிலையால் பாதிக்கப்படுகிறது” என்று சிகாகோவில் உள்ள ஃபீல்ட் மியூசியத்தில் பறவை பிரிவின் கண்காணிப்பாளரான ஜான் பேட்ஸ் கூறினார்.
நீண்ட கால சராசரியிலிருந்து ஒரு சில டிகிரி வெப்பநிலை உயரும்போது அந்த வெப்பநிலை உயர்வானது பூச்சிகள் உருவாக்கத்திலும், மரங்கள் இலைகளை முளைப்பதிலும், மலர்கள் மலர்வதிலும் பெரிய தாக்கத்தை ஏற்படுத்தும் என்று ஆராய்ச்சியாளர்கள் கூறியுள்ளனர். அதன்வழியே பறவை இனத்துக்கும் இம்முறை பாதிப்பு ஏற்படும் என்பது தெரிய வந்துள்ளதாக ஆராய்ச்சியாளர்கள் கூறுகிறார்கள்.
2019 ஆம் ஆண்டு நடத்தப்பட்ட ஆய்வின்படி, 1970 களில் இருந்து பறவைகளின் எண்ணிக்கையில் நிகழ்ந்த வீழ்ச்சிக்கு இந்த மாற்றங்கள் பல காரணங்களாக இருக்கலாம் என்று ஆராய்ச்சியாளர்கள் நம்புகின்றனர் .
மேலும், பேட்ஸ் மற்றும் அவரது சகாக்கள் சிகாகோவின் ஃபீல்ட் மியூசியத்தில் 1872 முதல் 1920 வரையிலான காலத்திற்கு சொந்தமான 1,500 க்கும் மேற்பட்ட முட்டை ஓடுகளை ஆய்வு செய்தனர். அந்த ஆய்வின் இறுதியில்தான், வளரும் பருவத்தில் அறிவிக்கப்பட்ட மாற்றங்களுடன் முட்டையிடுதல் முன்னதாகவே நடப்பதையும் அவர்கள் கண்டறிந்தனர்.
